Иш-чарага директорлор кеңешинин төрагасы А.Д. Турдубаев, директорлор кеңешинин мүчөлөрү А. Д. Баймуратов, Ж. К. Турускулов, О.Б. Кудайбердиев, М.А. Маматов, техникалык директор Ж.Ч. Ибраев, Окуу борборунун директору У. К. Маликов жана жамаат катышты.
Жыйында окуу борборунун 2024-жылдагы жыйынтыктары жана 2025-жылга карата пландары каралды. Директорлор кеңеши мекеменин ишмердүүлүгү, энергетиктерди даярдоо жана квалификациясын жогорулатуу процесси менен кеңири таанышып, окутуу заманбап технологияларды колдонуу менен жүргүзүлүшү үчүн окуу процессин методикалык, техникалык жактан жабдууну күчөтүүнүн маанилүүлүгүн белгиледи.
Окуу борборунда 2024-жылы 1274 адис билим алып, 145 окуу тобу уюштурулган.
Бул жерде төмөнкү адистиктер даярдалат: бийиктикке чыгуу иштери, электр слесары, электр газ ширетүүчү, жебелүү өзү жүргөн жүк көтөргүчтү жана манипуляторду тейлөөчү жумушчу, релелик коргоо жана автоматика, электр жабдууларын пайдалануу, электр эпкери, автотранспорттук каражаттарын пайдалануу боюнча “В” жана “С” категориясындагы айдоочулар ж.б.
«Кыргызстан улуттук электр тармагы» ААКтын Окуу борбору энергетика тармагынын кадрларын даярдоо, кайра даярдоо жана квалификациясын жогорулатуу, инженердик-техникалык кызматкерлердин жана энергетика тармагынын орто квалификациядагы билим деңгээлин жогорулатуу боюнча лицензияга ээ. Борбор башка энергокомпаниялардын жана уюмдардын кызматкерлерин да окутууга укуктуу.
